Dialogo tra un babbo e uno "sperto" sul voto del 26 Maggio

Babbo: “Liggivi aeri su Feisbùk che alle elezioni europee avèmu a votari pi la Lega e pi Salvini, pi fforza pi fforza!”

Sperto: “Mizzica! E picchì pi fforza?”

Babbo: “Picchì altrimenti addiventamo tutti negri, africani, nivuri o marruni como i carrubbi e li scravacchi”.

Sperto: “Como i carrubbi? E li scravacchi? Ma tu vero stai ricenno? O mi pare che tu stai babbianno, como 'o solito”.

Babbo: “U saccio ca sugnu babbo, ma sta vota un babbìo...u vero staiu ricennu: tutti nivuri addiventamu! Beddra Matri ra Cunfusiuni!”.

Sperto: “Ma cu è dru ran cretinu che dici e scrivi sti minchiati?”.

Babbo: “Mah...un certo fisolo...fisiofolo...”.

Sperto: “Filosofo vuoi dire!”

Babbo: “Bravo!”

Sperto: “E como si chiama stu ran lappano arrustutu di filosofo?”

Babbo: “Fasa.. Fisaru... Fissa... botta ri sali ca stu nnomu un mi ci trasi 'n testa!”

Sperto: “Miii.. tu di Diego Fusaro stai parlannu! Di dru ran fissa!”

Babbo: “Iddru! Iddru! Un ran pezzo ri bastianazzu giuvinazzu tuttu biddrazzu e abbronzatu, ca pari quasi iddru un mezzo africanu”.

Sperto: “Ma in sostanza, che min... soccu ricìa 'nsomma stu ran cretinu? Picchì avissimu a divintari tutti nivuri?”.

Babbo: “Picchì u Papa e u Piddì vogghiunu fari trasiri in Italia tutti l'africani ri stu munnu. E accussì, a picca a picca, niautri siciliani e italiani ni squagghiamu, ni cunfunnemu, addivintamu tutti bastardazzi, e alla fine tutti nivuri comu carrubbi e scravacchiuna! Ah...mi scurdavi... iddru rici ca chista è la... sostituziuni tecnica vuluta dal tubbocaspitalimmo...”

Sperto: “Sostituzione etnica voluta dal turbocapitalismo, vui diri”.

Babbo: “Giusto giusto! Mizzica, botta ri sango, tu tutto sai, vero sperto sì! Però, sinceramente, t'aiu a cunfissari ca eo un ci capivi nenti nenti na sta facenna stramma e 'mpirugghiata”.

Sperto: “E pi fforza un ci capisti nenti: 'na minchiata è! 'Na fissaria ranni comu un palazzu, invintata cent'anni fa, e che ancora firrìa pi tutta l'Europa como si fussi na ran novità, solu picchì a stu munnu ci sunnu migghiara ri babbi com'a ttia. Sent'a mmia: mancu Salvini ci criri a sta minchiata, ma fa finta ri cririrci picchì voli acchianari o puteri, voli addivintari u boss, u capu ri tuttu e ri tutti, u novu Duci cumannanti, e o megghio modo di vinciri l'eleziuni, secunnu iddru, è chiddru di fari scantari la genti! Beddra matri che scantu di moriri! Tutti nivuri addivintamu! E accussì i fissa si scantanu, si cacanu ri sutta, e ci rannu u votu a iddru chi sempri vucìa: porti chiusi! porti chiusi! chi ppari un pappaaddru 'mriacu”.

Babbo: “Ma u fisolo... u filosofu rici ca c'è un cappottu...un compottulu...”

Sperto: “Un complotto vui riri! Ma certu, puru chissa è a solita minchiata. A fissaria ru complottu mundiali di l'ebbrei e di li banchi pi futtiri a povera genti, u popolu mischinu. Ma tu sai che puru dru ran criminali e pazzu veru di Hitler crirìa a sta ran minchiata? Nazisti e fascisti ci criunu ancura, solu picchì un sunnu capaci di 'nvintari nenti di novu. Un fannu autru che ripitiri i stissi cosi... e i migghiara ri fissa e babbi com'a ttia a scantarisi pi nnenti”.

Babbo: “Però è vero ca di africani ci nn'è assai in giro...”.

Sperto: “E pi chissu n'avemu a scantari? Ma tu u sai che l'italiani sunnu u populu cchiù ammischiatu ru munnu? Pi secoli e secoli ci semu ammischiati cu tutti i razzi e i populi ca si ponnu immagginari. Ed è propriu pi sta raggiuni ca semu u populu chiù intelliggenti, geniali, criativu, creaturi di arti e di meravigghi ca tutt'u u munnu c'invidia”.

Babbo: “A chistu un c'avìa mai pinzatu”.

Sperto: “Bravo u me' babbo: ora ci pensi, e u 26 maggio viri r'un fari na ran babbiata di li toi!”

Babbo: “Chi voi diri?”

Sperto: “Vota pi ccu voi, ma un ci dari u votu a Salvini, alla Meloni e a tutti chiddri chi ti fannu scantari mettennuti 'n testa sti ran fissarii che dici u filosofu Quaquaraquà”.

Selinos